| Story |
Risamo Le Ekhu Nhi Thrami Ketshü
(“Friendship Between Risamo and The Tiger” taken from Kuzhami Sezhie Leshi 5th Issue, Threna-Eno, 2004.)
Risamo nü mhenye ketsü lethre emo, ne netho eh thromiro tenaah mecyi kelhi-ezo kewe kele, moi tadze tshü ketsü boe mecyi kewe thsü rö lhy wöh. Shy ketsü jelo lümi le zömiro tetshe pfü sonü lhywe she rö lhy wöh. Pu lhykewe pfü sonü netho loe lümi le’ emi kyemi katrö bo kezü deh. Shüdze’o nethoemiro nü pu pheh eni mo sonü puwe eh mehtsü deh rö netho elo füh meteh deh. Shy ketsü nhie Risamo nü eshü keleba yi wöh lhy ketsü shü pfhüh mewhöh deh. Neshyi rehmiro nü puwe eh mehtsü deh ketsü je’o netho eh mecyi lewöh e’sü deh. Nye daci di! shirö mesü kehte nhie, Nye mha ekhu eh zü thrami tshü lo sonü nethoemiro pheh mekhi puh de, shirö rhüh lo. Shisonü emhi le eza kehrü mewe lo, shio lhelewe tshüpfü lo sonü ewö ketsü-kezü eh temha. Temha ketsü nhie ketö’ kele phe pre lo lo kehwa kerö ekhu eh ko-o ko wöh. Shy wöh sonü te phe ketö kedzü kele boe lo “Ekhu-o,” shirö ko hi kehchi nhie letha ba lo “We-y” shirö ekhu nü khoh hi. “Nye nü iwe eh zü thrami thsü ni rö temha zeh a. Anhi thrami thsü de kheo!” shirö puh hi, Risamo nü. “Iley!” ekhu yi shy. Pu shirö te-temha ekhu kebeh shü letsabukie kewe kele loe tso lo.
Risamo le ekhu nhi letsabukie elo tase tshü, lishü-lizhe, moi wökedeh ledyedye kelhi dzero mecyi keta-kepu; shio keto-keso kezeto kezeso rö thrami thsü lo. Shisonü puenhi chüshü mha etshü’ füh. Etshü’ ye lolo ekhu nü metho to, ne Risamo nü khahto; shirö puenhi kelele khuwe mese to sonü kehzü lhy wöh. Kelele khuwe mese to ketsü nhie ekhu nü tsho, “Athra-o, i khuwe lo towe a.” shy meh.
Kenieni Risamo nü ekhu eh zü emhe thsü keqa de shirö khah hi. Tehtrorho kele puenhi kie letsabukie juba elatsö throh thsübo tetro kele phe rhüpfü rö beh. “Athra-o, anhi tehtrorho hino hi meketsha keqa de kheh!” shirö pu kezü ekhu eh shü khah hi. Shio ekhu yi tshoh “Ey, no nü thsü meri hi!” shy. “Mo-o, no nü thsü meri hi!’ shirö Risamo nü puh dele. Tehtrorho shü meketsha de shisonü ekhu yi rhi-ena thsü rö meke-ke phe’ lhotri deh rö meketsha eha deh. Shü eh lethre emo, ne pu keti zhimö mecyi kezhikhö deh rö tezhy meha pre deh. Shüdzelo Risamo nhie, “Nye thsü eha dah, no yi thsü zoh hi, shirö phe tetse lo rö Risamo eh zoh eh. Shü nhie Risamo nü pu za pfo erho shü methetshatritri deh sonü melöh kele’ thsü rö tehtrorho shü botsha phapha deh. Ekhu nü shüshü ngö rö, “Ayale, no-o we dah le,”shirö nimesüchy rö beh deh.
Shü chy puenhi kelele khinie (mekhi) pu de ketsü keta shy. Risamo nü ekhu nhie, “Athra-o, no dibi-o metha mede i?” shirö enü. Shio ekhu nü, “Nye nü meni kieminhi zü-o metha mede a. Kedzüdzüemo puenhi nü a khwe che hi’o mehse throkenhi lo awe eh fü wöh toto by le’,” shy. Shüdzelo puenhi ekhu khinie pu deh sonü eda medzü lo. Risamo nü ekhu nhie puh ketsü, “Athra-o, anhi temha eshü melamelö ketsü shü kele loe beh lo sonü tshübo kele phe mele’ pre beh lo de. No nü terho phe pre beh lo! Nye nü tenöh phe beh sonü emhi pfo khwe eh de,” shirö puh hi. “Ey!” ekhu yi shy. Rhüh kechi thre sonü puenhi temha tshübo kele phe mele’ pre beh lo. Shirö ekhu nü erö leko pfoso metsüthsü hi. Shio mehse meni kieminhi shü wöh ekhu le Risamo nhi kebeh tshübo phe shü rah lo. Shünhie Risamo nü emhi kele zah pfo meni kele eh zheto deh. Shü chy emhi kedzü kele zah dele hi sonü meni kedzü eh yi tshethru deh. Shüthre sonü Risamo nü meni kenhi-o tshethru deh. Hithre sonü ekhu khinie pu lo!
Shü chy ekhu mecyi Risamo mekhi puh de shisonü Risamo nhie, “Athra-o, no dibi lo mehtha mede ro?” shiro nü. Risamo nü ekhu se kele’ ketsü, “A remi nü awe eh netho elo fümeteh deh ketsü jeo Nye nü puuro eh je rö beh dah, shüjelo mha remi pheh a mekhi puh de.” “Ey, isham” ekhu yi shy. Shirö puenhi te Risamo netho eh wöh. Puenhi te netho eh kewöh nhie nethoemi, thromi-lümiro zathobe thu sonü chele pfosoh metsüthsü rö beh. Shükie zathomi kie kiedithro eh voolü diepo-diezü kele züh eh. Risamo nü ekhu elo phe voolü shü tsü lo, shirö meloh hi. Ekhu nü phe’ voolü shü tsü hi lo evo nü rö yiyi hi. Shio mehse thromiro medu kumi pfo ekhu eh füpre. Shükie Risamo nü meshi ku’-ku’ lu pu mhi pfo thromiro eh mezo lo. Minuro Risamo eh ngö hi lo mehtha rö teh mera phah deh.
Shü chy nethoemiro mehtha sonü metshü’ mepö rö tase thsü e kehlo hithre, “Ekhu khudie le Risamo nhi thrami thsü lo dah. Shüjelo ami remi lhy zhü e’ kehlo by eh mo dah. Aro mha Risamo eh teri sonü puwe elo wöh netho eh lhy dele deh-o! shirö teri de,” shirö keta lo. Shüthre sonü nethoemi trütaro mha Risamo eh zü tase thsü rö puwe eh teri. Kerikie nü Risamo nü netho eh wöh dele mvü rö beh. Kedzüdzüemo, pu thra pu kezü kewe ekhu eh khe zeteh nimo bi ketsü dzelo. Ne menöba phe nethoemiro se meli eha sonü wöh netho eh lhy dele deh. Ekhu le Risamo nhi kekho nimo she, neshyi kekho maha deh ketsü jelo hithre rö puenhi tenaah sekho kele thsü lo: “Anhi ketöyi chy e de eh kebeh nhie sezhie pfo kelele eh metso hi de, shysonü chy kemo elo wö kelele eh mese de,” shyrö keta lo. Tsülo keje be ketsü chy, Risamo nü mhethsüh rö chy e de weh. Shüdzelo ekhu eh mepu hi. Setsa thsü kebeh thre ekhu mecyi wöh Risamoে kie kiedithro elo Risamo eh mese. Shisonü puenhi kelele eh lisü rö nhejü mezhu dzü kelele bazhu loe chi, shirö kekho deh meh.